ກົມໄປສະນີ ຈັດພິທີມອບ-ຮັບຄອມພີວເຕີ

ໃນວັນທີ 3 ພະຈິກ 2020 ຜ່ານມານີ້ ທີ່ສະຖາບັນເຕັກໂນໂລຊີສື່ສານຂໍ້ມູນຂ່າວສານ ກົມໄປສະນີ, ກະຊວງ ປທສ ໄດ້ຈັດພິທີມອບ-ຮັບຄອມພິວເຕີຈໍານວນ 200 ໜ່ວຍ  ທີ່ໄດ້ຮັບການຊ່ວຍເຫຼືອລ້າຈາກກະຊວງວິທະຍາສາດ ແລະ ເຕັກໂນໂລຊີສື່ສານຂໍ້ມູນຂ່າວສານ ແລະ ອົງການຂໍ້ມູນຂ່າວສານສັງຄົມແຫ່ງຊາດ ຂອງປະເທດສາທາລະນະລັດເກົາຫຼີ, ໂດຍໄດ້ຮັບກຽດຈາກທ່ານ ຊິນ ຊອງຊຸນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງສາທາລະນະລັດເກົາຫຼີ ປະຈຳ ສປປ ລາວ  ເປັນຕົວແທນມອບ ແລະ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ, ໂທລະຄົມມະນາຄົມ ແລະ ການສື່ສານເປັນຜູ້ຮັບ.


ພາຍໃນພິທີທ່ານ ບຸນສະເຫຼີມໄຊ ເຄນນາວົງ ໄດ້ກ່າວສະແດງຄວາມຂອບໃຈ ຜ່ານທາງສະຖານທູດເກົາຫຼີ ປະຈໍາ ສປປ ລາວ ໄປຍັງລັດຖະບານ ແລະ ປະຊາຊົນເກົາຫຼີ ໂດຍສະເພາະແມ່ນກະຊວງວິທະຍາສາດ ແລະ ເຕັກໂນໂລຊີສື່ສານຂໍ້ມູນຂ່າວສານ ແລະ ອົງການຂໍ້ມູນຂ່າວສານສັງຄົມແຫ່ງຊາດ, ສ. ເກົາຫຼີ ທີ່ໄດ້ໃຫ້ການ ຊ່ວຍເຫຼືອຄອມພິວເຕີຈຳນວນດັ່ງກ່າວ, ຊື່ງການຊ່ວຍເຫຼືອຄັ້ງນີ້ມີຄວາມສໍາຄັນຫຼາຍໃນການຍົກລະດັບການຄຸ້ມຄອງບໍລິຫານຂອງລັດໃຫ້ມີຄວາມທັນສະໄໝຫຼາຍຂຶ້ນ, ໃນນີ້ຄອມພີວເຕີຈຳນວນໜຶ່ງຈະໄດ້ນຳໃຊ້ສ້າງເປັນຫ້ອງຝຶກອົບຮົມຮຽນຮູ້ນໍາໃຊ້ເຕັກໂນໂລຊີດ້ານໄປສະນີ 01 ຫ້ອງຫ້ອງຝຶກອົບຮົມສໍາລັບຄູອາຈານສອນວິຊາສະເພາະໄປສະນີ ແລະ ເຕັກໂນໂລຊີສື່ສານຂໍ້ມູນຂ່າວສານ 01 ຫ້ອງ, ສ່ວນທີ່ເຫຼືອຈະໄດ້ແຈກຢາຍໃຫ້ກັບພະແນກ ປທສ ທົ່ວທຸກແຂວງ ໃນການຍົກລະດັບການຄຸ້ມຄອງວຽກງານໄປສະນີໃຫ້ເປັນຮູບແບບເອເລັກໂຕຣນິກ ໂດຍສະເພາະແມ່ນນຳໃຊ້ເຂົ້າໃນການຄຸ້ມຄອງການອອກໃບອະນຸຍາດດຳເນີນທຸລະກິດດ້ານໄປສະນີ.

 

ພາຍຫຼັງມອບຮັບກັນແລ້ວ ທ່ານ ຮອງລັດຖະມົນຕີ ກະຊວງ ໄປສະນີ ໂທລະຄົມມະນາຄົມ ແລະ ການກໍ່ສ້າງ ຍັງໄດ້ມອບໃບກຽດຕິຄຸນໃຫ້ແກ່ທ່ານທູດ ເພື່ອຢັ້ງຢືນໃນຄຸນງາມຄວາມດີຂອງລັດຖະບານ ສ ເກົາຫຼີທີ່ມີຕໍ່ ສປປ ລາວ ແລະ ຢັ້ງຢືນເຖິງສາຍພົວພັນອັນດີລະຫວ່າງສອງຊາດລາວ-ເກົາຫຼີ.