ໄປສະນີລາວເປີດຂະບວນແຂ່ງຂັນຮັກຊາດ ແລະ ພັດທະນາ

"ລັດວິສະຫະກິດໄປສະນີລາວສ້າງຂະບວນການແຂ່ງຂັນຮັກຊາດ ແລະ ພັດທະນາພາຍໃນບໍລິສັດ"

ກອງປະຊຸມໄດ້ເປີດຂື້ນ ໃນຕອນເຊົ້າຂອງວັນທີ 03/07/2020 ທີ່ສຳນັກງານໃຫຍ່ ບ້ານ ຊຽງຍືນ, ເມືອງ ຈັນທະບູລີ, ນະຄອນຫຼວງວຽງຈັນ ມີບັນດາແຂກເຂົ້າຮ່ວມຈາກກົມວິຊາການ, ລັດວິສະຫະກິດ ອ້ອມຂ້າງກະຊວງໄປສະນີ ໂທລະຄົມມະນາຄົມ ແລະ ການສື່ສານ ແລະ ບັນສະມາຊິກພັກ, 3 ອົງການຈັດຕັ້ງມະຫາຊົນ ພາຍໃນບໍລິສັດ ເຂົ້າຮ່ວມທັງໝົດ 38 ຄົນ ພາຍໃຕ້ການເປັນປະທານຂອງ ສະຫາຍ ປອ ພູຫວິນ ຟອງສະມຸດ ຜູ້ອຳນວຍການໃຫຍ່ລັດວິສະຫະກິດໄປສະນີລາວ

ຈຸດປະສົງຂອງກອງປະຊຸມ ເພື່ອເປີດເນື້ອໃນຂໍ້ແຂ່ງຂັນ ແລະ ພັດທະນາຕົນເອງ ຂອງບັນດາພະແນກການ ແລະ ບັນດາສາຂາແຂວງ ພາຍໃນບໍລິສັດ ຂະບວນການດັ່ງກ່າວຈະເປັນຂີດໝາຍອັນສຳຄັນ ໃນການຍົກສູງການຄຸ້ມຄອງຂອງຕົນໃຫ້ມີຄວາມເຂັ້ມແຂງ ແນ່ໃສ່ເຮັດໃຫ້ການບໍລິການທົ່ວສັງຄົມມີຄຸນນະພາບ ທີ່ດີຂື້ນ.

ກອງປະຊຸມໄດ້ຜ່ານເນື້ອໃນການນຳພາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ ການນຳພາຂອງ ຄະນະພັກຮາກຖານ ປະຈຳປີ 2020 ຈາກນັ້ນໃຫ້ແຕ່ລະພະແນກເປົ້າໝາຍ, ສາມອົງການຈັດຕັ້ງມະຫາຊົນ ຂື້ນຜ່ານເນື້ອໃນຂໍ້ແຂ່ງຂັນຂອງຕົນ ແລະ ໄດ້ຈັບມື ປະຕິຍານຕົນ ໃນການຈັດຕັ້ງປະຕິບັດຄາດໝາຍຂອງແຜນການ 06 ເດືອນທ້າຍປີໃຫ້ສຳເລັດ.

ທີ່ປະຊຸມໄດ້ຮັບຮອງເອົາເນື້ອໃນບົດສະຫລຸບ ແລະ ທິດທາງແຜນການ ຂອງຄະນະພັກຮາກຖານ, ຮັບຮອງເອົາເນື້ອໃນຂໍ້ແຂ່ງຂັນ ໂດຍມີຄາດໝາຍລວມ ດັ່ງນີ້:

- ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ

- ເພີ່ມທະວີການນຳພາ 3 ອົງການຈັດຕັ້ງມະຫາຊົນໃຫ້ມີຄວາມເຂັ້ມແຂງ

- ຮັບປະກັນສ້າງຄວາມເຂັ້ມແຂງໃຫ້ແຕ່ລະຫົວໜ່ວຍບໍລິການໃຫ້ມີມາດຕະຖານ ແລະ ຄຸນນະພາບທີ່ດີ