ພິທີເປີດໂຕບໍລິສັດຮຸ່ງອາລຸນຂົນສົ່ງດ່ວນ

ບໍລິສັດນ້ອງໃໝ່ໄຟແຮງໃນການບໍລິການສົ່ງ ແລະ ແຈກຍາຍ ພັດສະດຸ ໄດ້ເປີດໂຕຢ່າງເປັນທາງການໃນຄໍ່າຄືນຂອງວັນທີ 20/02/2020 ຊື່ງເປັນມື້ງາມຍາມດີ ທີ່ມີແຕ່ເລກ 0 ແລະ 2 ຂອງປະຕິທິນມື້ດັ່ງກ່າວ. "ຮຸ່ງອາລຸນໃຫ້ຫຼາຍກວ່າການຂົນສົ່ງ" ເປັນບໍລິສັດໜື່ງ ທີ່ໄດ້ເປີດດຳເນີນທຸລະກິດ ໃຫ້ບໍລິການຂົນສົ່ງ ແລະ ແຈກຍາຍ ພັດສະດຸ ມາແຕ່ປີ 2019 ຊື່ງຕະຫຼອດໄລຍະທີ່ໃຫ້ບໍລິການ ແກ່ປະຊາຊົນ ສັງຄົມກໍໄດ້ໃຫ້ການຕອບຮັບເປັນຢ່າງດີ ຈົນມາຮອດ ທ້າຍເດືອນ ກຸມພາ ປີ 2020 ນີ້ ຖັດຈາກວັນແຮງຄວາມຮັກ ມາອີກ 6 ວັນ ກໍໄດ້ເປີດໂຕຢ່າງຍິ່ງໃຫຍ່ ແລະ ສົມສັກສີ ໃນລະດັບຊັ້ນຈາກ 2 ລາງວັນ ນັກທຸລະກິດໜຸ່ມດີເດັ່ນ ຂອງ ສປປ ລາວ ແລະ ລາງວັນນັກທຸລະກິດໜຸ່ມດີເດັ່ນ ຂອງອາຊຽນ ປະຈຳປີ 2019.

ສີສະຫວັນ ມ່າຢົງເຊິນ ຫຼື ອາຊິ ປະທານບໍລິສັດ ຮຸ່ງອາລຸນ ຂົນສົ່ງດ່ວນ ນັກທຸລະກິດໜຸ່ມຫຼໍ່ ທີ່ມີຄວາມກະຕື້ລື້ລົ້ນ ໃນການພັດທະນາຕົນເອງ ແລະ ແຮງສະໜັບສະໜູນ ຈາກທັງພາກລັດ, ສັງຄົມ ແລະ ບັນດາອ້າຍພະນັກງານພາຍໃນບໍລິສັດເອງ ສາມາດຜ່ານຜົນງານຫຼາຍໆດ້ານ ໃຫ້ເປັນທີ່ປະຈັກ ບໍ່ວ່າໃນດ້ານທຸລະກິດ, ການຊ່ວຍເຫຼືອສັງຄົມ ທັງໃນລະດັບປະເທດ ກໍຄືລະດັບສາກົນ, ມາຮອດປະຈຸບັນບໍລິສັດດັ່ງກ່າວ ສາມາດສ້າງວຽກເຮັດງານທຳ ໃຫ້ແກ່ຄົນລາວເຖິງ 200 ກວ່າຕຳແໜ່ງ, ບັນລຸຄາດໝາຍ ໃນການຈໍລະຈອນພັດສະດຸໄດ້ຫຼາຍກວ່າ 400.000 ລາຍການ ໃຫ້ແກ່ສັງຄົມ ຊື່ງໄດ້ກາຍມາເປັນອີກທ່າແຮງໜຶ່ງ ໃນການກຽມຄວາມພ້ອມ ເພື່ອສະໜອງການເຊື່ອມຈອດລະຫວ່າງຜູ້ຊື້ ແລະ ຜູ້ຂາຍ, ຜູ້ຜະລິດ ແລະ ຜູ້ບໍລິໂພກ ທັງຈາກລະຫວ່າງປະເທດ ແລະ ພາຍໃນປະເທດ ໃຫ້ແກ່ການຂະຫຍາຍຕົວເສດຖະກິດດີຈີຕອນໃນອານາຄົດ ຕາມທິດທັນປ່ຽນປະເທດໃຫ້ເປັນອຸດສະຫະກຳທັນສະໄໝຂອງລັດຖະບານ.

ໃນອານາຄົດ ອາຊີ ຍັງໄດ້ວາງວິໄສ ຂອງຕົນທີ່ຈະພັດທະນາການບໍລິການຂົນສົ່ງ-ແຈກຍາຍ ພັດສະດຸ ໃຫ້ເປັນບໍລິສັດຊັ້ນນຳ ໃນການນຳເອົາເຕັກໂນໂລຊີສື່ສານຂ່າວສານ ມາຊ່ວຍໃນການໃຫ້ບໍລິການຂອງຕົນ ເພື່ອໃຫ້ໄດ້ມາດຕະຖານ ແລະ ຄຸນນະພາບ ທຽບເທົ່າສາກົນ ເປັນຕົ້ນ ຕູ້ແຈກຍາຍອັດສະລິຍະ ທີ່ຈະນຳໄປຕິດຕັ້ງຢູ່ຊຸມຊົນຕ່າງໆ ໃນຂອບເຂດທົ່ວປະເທດ, ນອກນັ້ນ ເພື່ອສ້າງຄວາມໝັ້ນໃຈ ແລະ ເພິ່ງພໍໃຈ ໃຫ້ແກ່ລູກຄ້າ ຍັງມີໂປຼແກຼມໃນການຕິດຕາມເຄື່ອງຝາກ ຊື່ງມີຄວາມສະດວກສະບາຍ ໄວ້ໃຫ້ບໍລິການແກ່ປະຊາຊົນ ຜ່ານໂທລະສັບສະມາດໂຟນ ແລະ ຊ່ອງທາງໃຫ້ຂໍ້ມູນຂ່າວສານຂອງຕົນ ຜ່ານເພສ ໃນເຟສບຸກ.